ലോകാദ്ഭുതങ്ങളിൽ ഒന്നായ ഈഫൽ ടവറിനും ഇടിമിന്നലേറ്റു. ചൊവ്വാഴ്ച വൈകുന്നേരമുണ്ടായ കനത്ത മഴയ്ക്കിടയിലാണ് ഇടിമിന്നലേറ്റത്. മെയ് മാസം മാത്രം പാരിസിൽ 147,981 മിന്നലുകൾ ഉണ്ടായതായി കാലാവസ്ഥാ വിഭാഗം അറിയിച്ചു. ഈ ദിവസം നിരവധി തവണ ഈഫൽ ടവറിന് മിന്നലേറ്റതായും അതിനു മുകളിൽ സ്ഥാപിച്ചിരിക്കുന്ന മിന്നൽ രക്ഷാചാലകം അഥവാ അയൺ റോഡുകൾ മിന്നലിനെ നിർവീര്യമാക്കിയതായും കാലാവസ്ഥാവിഭാഗം വ്യക്തമാക്കി. ഒരു വർഷത്തിൽ 10 തവണയെങ്കിലും ഈഫൽ ടവറിന് ഇടിമിന്നലേൽക്കാറുണ്ട്. എന്നാൽ ഇതാദ്യമായാണ് ഈ ദൃശ്യങ്ങൾ സമൂഹമാധ്യമങ്ങളിൽ ചർച്ചയാകുന്നത്.
മേഘങ്ങളിൽ നടക്കുന്ന വൈദ്യുതി ചാർജുകളുടെ പ്രവാഹമാണു മിന്നൽ എന്നു ശാസ്‌ത്രീയമായി പറയാം. അല്ലെങ്കിൽ മേഘങ്ങളുടെ ഘർഷണത്തിൽ നിന്നുണ്ടാകുന്നതാണു മിന്നൽ. ഈ വൈദ്യുതിപ്രവാഹത്തിന്റെ ഫലമായി ഇടിയുമുണ്ടാകുന്നു. മിന്നലിനെ ശാസ്‌ത്രീയമായി രണ്ടായി വേർതിരിച്ചിട്ടുണ്ട്. മേഘങ്ങൾക്കിടയിൽ സംഭവിക്കുന്നതും മേഘത്തിനും ഭൂമിക്കുമിടയിൽ സംഭവിക്കുന്നതും. വൈദ്യുതിപ്രവാഹം മേഘങ്ങൾക്കിടയിൽ പ്രവഹിക്കുന്നതു നമുക്കു ദോഷം ചെയ്യില്ല. എന്നാൽ മേഘങ്ങളിൽ നിന്ന് ഈ പ്രവാഹം ഭൂമിയിലേക്കാണു സഞ്ചരിക്കുന്നതെങ്കിൽ അപകടഭീഷണിയുണ്ടാകുന്നു. ഭൂമിയുടെ പ്രതലത്തിൽ നിന്ന് ഉയർന്നു നിൽക്കുന്ന വസ്‌തുക്കളിൽ മിന്നലേൽക്കാൻ സാധ്യത കൂടുതലാണെന്നതാണ് അപകടഭീഷണിയുണ്ടാക്കുന്നത്.
മനുഷ്യനും മൃഗങ്ങൾക്കും ജീവഹാനി വരെ വരുത്തി വയ്‌ക്കുന്നതാണു മിന്നൽ. മരങ്ങൾ, കെട്ടിടങ്ങൾ, വൈദ്യുതോപകരണങ്ങൾ തുടങ്ങിയവയുടെ നാശത്തിനും ഇവ കാരണമാകുന്നു. അമിതമായ വൈദ്യുതി പ്രവാഹമാണു മിന്നലിനെ വിനാശകാരിയാക്കുന്നത്. ഇവയിൽ നിന്നുള്ള അപകടങ്ങൾ അവിചാരിതമാണെങ്കിലും.
ചരിത്ര ചാലകം
മിന്നലിന്റെ അപകടഭീഷണിയൊഴിവാക്കാൻ നമുക്കു മുൻകരുതലുകൾ സ്വീകരിക്കാൻ കഴിയും. ശാസ്‌ത്രത്തിന്റെ വളർച്ചയിൽ മിന്നലിൽ നിന്നു രക്ഷനേടാനുള്ള ഉപകരണങ്ങളെ കുറിച്ചു വിശദമായ പഠനങ്ങൾ ഇപ്പോഴും നടക്കുന്നുണ്ട്. കെട്ടിടത്തിനു മുകളിൽ ഇന്ന് ഉപയോഗിക്കുന്ന മിന്നൽരക്ഷാ ചാലകങ്ങൾ നൂറ്റാണ്ടുകൾക്കു മുൻപു ഫലപ്രദമായി ഉപയോഗിച്ചിരുന്നവയാണെന്നാണു നിഗമനം.
മിന്നൽ രക്ഷാചാലകം
സാധാരണയായി കെട്ടിടങ്ങളുടെ ഏറ്റവും ഉയർന്ന ഭാഗത്താണ് മിന്നൽ രക്ഷാചാലകം സ്ഥാപിക്കുന്നത്. അറ്റം കൂർപ്പിച്ച ഒരു കമ്പിയാണിത് .ഇത് നല്ല കനമുള്ള ചെമ്പുതകിടുമായി ഭൂമിയുമായി ബന്ധിപ്പിച്ചിരിക്കും. ഉയർന്ന ഭാഗത്തുണ്ടാകുന്ന മിന്നലിൽ നിന്നു വൈദ്യുതി പെട്ടെന്ന് ഭുമിയിലേക്ക് ധാരയായി പ്രവഹിപ്പിക്കുകയാണ് ഇതിന്റെ ലക്ഷ്യം ഈ ചാലകങ്ങളിൽ പതിക്കുന്ന മിന്നലിന്റെ ഊർജം എർത്തിങ് സംവിധാനം വഴി പുറത്തേക്കു പ്രവഹിക്കുന്നതു വഴിയാണു കെട്ടിടങ്ങളും മറ്റും സുരക്ഷിതമാകുന്നത്.
. ഏതുസമയത്തും ലോകത്തിന്റെ വിവിധ ഭാഗങ്ങളിൽ 100 ഇടിമിന്നലെങ്കിലുമുണ്ടാകുന്നു. അതായതു ദിവസം എട്ടുലക്ഷത്തിലധികം മിന്നലുണ്ടാകുന്നുണ്ട്.
. ഒരു മിന്നലിന്റെ നീളം ചുരുങ്ങിയത് ആറു കിലോമീറ്ററുണ്ടായിരിക്കും.
. മിന്നലിനു സൂര്യന്റെ ഉപരിതലത്തേക്കാൾ അഞ്ചുമടങ്ങ് അധികം ചൂടുണ്ട്.
. 20000 വോൾട്ടിനു മേലാണു മിന്നലിലെ വൈദ്യുതിയുടെ തോത് (നമ്മുടെ വീട്ടിൽ ഉപയോഗിക്കുന്നത് 220230 വോൾട്ട് ആണെന്ന് ഓർക്കുക)
. 100 ടൺ ടിഎൻടി ഒരുമിച്ചു പൊട്ടിയാലുണ്ടാവുന്നത്ര വൻ സ്‌ഫോടനമാണു മിന്നലുണ്ടാക്കുന്നത്.
. ആറോ ഏഴോ ഉപശാഖകളിൽ നിന്നാണു വലിയൊരു മിന്നൽ രൂപപ്പെടുന്നത്.
. മൂന്നു മുതൽ ആറു മില്ലിസെക്കൻഡ് വരെയാണു മിന്നലിന്റെ ശരാശരി ദൈർഘ്യം
. പെരുവിരലിനോളം വണ്ണമുള്ള ശാഖകളിലൂടെയാണു മിന്നലിൽ വൈദ്യുതി പ്രവഹിക്കുന്നത്.
. സെക്കൻഡിൽ 600000 മൈൽ എന്ന വേഗത്തിലാണു മിന്നൽ സഞ്ചരിക്കുന്നത്
. ശക്‌തിയായ ഒരു മിന്നലിൽ നിന്നുണ്ടാകുന്ന വെളിച്ചം ഒരുകോടി 100 വാട്ട് ബൾബുകൾ ഒരുമിച്ചു പ്രകാശിപ്പിക്കുന്നതിനേക്കാൾ അധികമാണ്.
. ഭൂമിയിലേക്കു പതിക്കുന്നതിന്റെ മുപ്പതിരട്ടിയോളം മിന്നലുകൾ മേഘങ്ങൾക്കിടയിലാണു സംഭവിക്കുന്നത്.
. ഭൂമിയിൽ ജീവനുണ്ടാകാനുള്ള സാധ്യതയുണ്ടാക്കിയതു മിന്നലുകളാണെന്നു ശാസ്‌ത്രം വിലയിരുത്തുന്നു.
. ധ്രുവങ്ങളിൽ ഒരിക്കലും മിന്നൽ ഉണ്ടാകാറില്ല.
. വിദേശങ്ങളിൽ ഏറ്റവും ഉയരമേറിയ കെട്ടിടങ്ങളിൽ ഉപയോഗിക്കുന്ന മിന്നൽ രക്ഷാചാലകങ്ങൾക്കു മൂന്നുകിലോമീറ്ററോളം പരിധിയിലുള്ള മിന്നലുകൾ പിടിച്ചെടുക്കാൻ കഴിയും.
0 Comments